ជប៉ុន៖ ចាប់ពីថ្ងៃទី០១ ខែមីនា ឆ្នាំ២០២៣នេះ ប្រទេសជប៉ុននឹងធ្វើការដកហូតនូវការរឹតបន្តឹងព្រំដែនទៅលើអ្នកដំណើរដែលមកពីចិន ដែលរួមមានដូចជាការបញ្ចប់វិធានការតេស្តលើអ្នកដំណើរដែលមកពីប្រទេសចិនជាដើម។ នេះបើយោងតាមការប្រកាសរបស់អ្នកនាំពាក្យជាន់ខ្ពស់នៃរដ្ឋាភិបាលជប៉ុន។ 

ជំនួសឱ្យការធ្វើតេស្តទៅលើរាល់អ្នកដំណើរមកពីចិន ជប៉ុននឹងធ្វើតេស្តតែទៅលើអ្នកដំណើរមួយចំនួនដែលមានការសង្ស័យប៉៉ុណ្ណោះ ខណៈអ្នកដំណើរមកពីចិននៅតែតម្រូវឱ្យបង្ហាញលទ្ធផលធ្វើតេស្តអវិជ្ជមានមុនធ្វើដំណើរមកកាន់ប្រទេសជប៉ុនដដែល។ នេះបើយោងតាមការលើកឡើងរបស់មន្រ្តីទទួលបន្ទុក លោក Hirokazu Matsuno។

លោក Matsuno បញ្ជាក់ថា ការផ្លាស់ប្តូរវិធានការនេះធ្វើឡើងដើម្បីជួយសម្រួលឱ្យការធ្វើដំណើរជាអន្តរជាតិមានលក្ខណៈរលូន និងធ្វើឡើងក្រោយការរកឃើញវិជ្ជមានកូវីដ-១៩ លើអ្នកដំណើរមានការធ្លាក់ចុះទាប។ មន្រ្តីដដែលបានបន្តថា ជំហានបន្ទាប់ជើងហោះហើរជប៉ុនក៏នឹងមានការអនុញ្ញាតឱ្យហោះហើរត្រង់ពីចិនមកកាន់គោលដៅសំខាន់មួយចំនួនក្នុងប្រទេសជប៉ុនផងដែរ ខណៈកន្លងមកជើងហោះហើរពីចិនត្រង់មកជប៉ុនមានតែលើអាកាសយានដ្ឋានមួយចំនួនប៉ុណ្ណោះរួមមានដូចជាអាកាសយានដ្ឋានអន្តរជាតិ Narita, Haneda, Kansai និង Chubu ជាដើម។ 

គួរបញ្ជាក់ថា ថ្មីៗនេះ ជប៉ុន និងកូរ៉េខាងត្បូងបានលើកឡើងពីការបន្ធូរបន្ថយការរឹតបន្តឹងវិធានការសុខាភិបាលទៅលើអ្នកដំណើរមកពីចិន ក្រោយពីអត្រាឆ្លងនៃវីរុសកូវីដ-១៩ នៅក្នុងប្រទេសចិនបានបន្តធ្លាក់ចុះ ក្រោយរដ្ឋាភិបាលប្រកាសបិទបញ្ចប់គោលនយោបាយ ZERO-Covid កាលពីឆ្នាំមុន។ កន្លងមក ឆ្លើយតបទៅនឹងវិធានការរបស់ជប៉ុន និងកូរ៉េខាងត្បូង ប្រទេសចិនបានសងសឹកដោយការផ្អាកការចេញទិដ្ឋាការរយៈពេលខ្លីទៅឱ្យអ្នកដំណើរមកពីប្រទេសទាំងពីរនេះដូចគ្នា។ យ៉ាងណាមិញ ថ្មីៗនេះកូរ៉េខាងត្បូងបានលុបចោលវិធានការលើអ្នកដំណើរមកពីចិន ហើយចិនក៏បានអនុញ្ញាតឱ្យផ្តល់ទិដ្ឋាការឱ្យអ្នកដំណើរកូរ៉េខាងត្បូងឡើងវិញជាធម្មតា៕